அக்டோபர் 31

 "இன்று அவருடைய சத்தம்"

அக்டோபர் 31

🔸️ அன்பில் பெருகிடக்கடவோம்! 🔸️

ஆண்டவராகிய இயேசு, பத்துக் கற்பனைகளை இரண்டு கற்பனைகளாகத் தொகையிட்டுக் கூறினார். முதலாம் கற்பனை யாதெனில், "உன் தேவனாகிய கர்த்தரிடத்தில் உன் முழு இருதயத்தோடும், உன் முழு ஆத்துமாவோடும், உன் முழு மனதோடும் அன்புகூருவாயாக" என்பதுதான். இரண்டாம் கற்பனை யாதெனில், "உன்னிடத்தில் நீ அன்புகூர்வதுபோல பிறனிடத்திலும் அன்புகூருவாயாக" என்பதே ஆகும் (மத்தேயு 22:37). இந்த இரண்டாவது கற்பனையைத்தான் இயேசு புதிதான கட்டளை எனக் குறிப்பிட்டு, "நான் உங்களில் அன்பாய் இருந்ததுபோல நீங்களும் ஒருவரிலொருவர் அன்பாயிருங்கள்" என சீஷர்களிடம் கட்டளையிட்டார் (யோவான் 13:34).

ஓர் உண்மையான இயேசுவின் சீஷன், தேவனையே மையமாகக்கொண்டு வாழ்ந்திட வாஞ்சிப்பான். தன் வாழ்வில் தேவன் கொண்டிருக்கும் சித்தத்திற்குப் புறம்பாகத் தனக்கென எவ்வித இலட்சியமோ அல்லது விருப்பமோ ஒருபோதும் கொண்டிட மாட்டான். இவ்விதம் தேவனை மையமாகக் கொண்டு ஜீவிக்கும் இந்த சீஷன், இயேசு தன்னை நேசித்தது போலவே தன் சகோதரர்களையும் பங்கமின்றி நேசிப்பான்! நம் சகோதரர்களிடம் நாம் கரிசனை கொள்வதே அவர்களை அன்புகூர்வதாகும். 

இந்த உலகத்திலுள்ள ஒவ்வொருவருக்காகவும் நாம் கரிசனை கொண்டிட முடியாது! அந்த அளவிற்கான திராணி தேவனுக்கு மாத்திரமே உண்டு. ஆனால் நம்முடைய திராணிக்கேற்ப நம்முடைய சக விசுவாசிகளிடம் நாம் நிச்சயமாய் கரிசனை காட்டிட வேண்டும். இவ்விதமாய் கரிசனை காட்டும் நம் திராணியின் அளவு தொடர்ந்து பெருகிக் கொண்டேயும் வரவேண்டும். முதல் படியாக, இயேசு நம்மை நேசிப்பது போலவே, நம் வீட்டிலுள்ள குடும்ப அங்கத்தினர்களை அன்புகூர வேண்டும். பின்பு, இதோடு நாம் நின்றுவிடாமல், தேவனுடைய குடும்பத்திலிருக்கும் சகோதர சகோதரிகளை, நேசிக்கும்படி வளர்ச்சியடைய வேண்டும்! 

இலக்கை நோக்கி முன் தொடர்வதுதான் பூரணமாகும்! பவுல் இவ்விதத் தீர்மானத்தோடுதான் முன்னேறிச் சென்று, "ஒன்று செய்கிறேன், பின்னானவைகளை மறந்து, முன்னானவைகளை நாடி, கிறிஸ்து இயேசுவுக்குள் தேவன் அழைத்த பரம அழைப்பின் பந்தயப்பொருளுக்காக இலக்கை நோக்கித் தொடருகிறேன்" (பிலி. 3:13,14) எனக் கூறினார். 

1) தேவனையே மையமாகக் கொண்ட ஜீவியத்தில் நாம் பிழையற்றவர்களாய், எல்லாவற்றிற்கும் மேலாக அவரையே நேசித்து, பின்பு 2) இயேசு நம்மை நேசிப்பது போலவே, நம் சக விசுவாசிகளையும், பிறரையும் நேசிப்பதுமாகிய இந்த இரண்டு அன்பின் பிரமாணங்களே தேவன் நமக்கு முன் வைத்திருக்கும் பரம அழைப்பாகும்!   

ஜெபம்:

எங்கள் பரம தகப்பனே! உம்மை நேசிக்கும் நாங்கள், எங்கள் குடும்பத்தார் துவங்கி, சபையின் சக சகோதர சகோதரிகள் வரை நேசிக்கும் அன்பில் வளர கிருபை தாரும்! கர்த்தராகிய இயேசு கிறிஸ்துவின் நாமத்தில், ஆமென்.

எழுதியவர்:

சகோதரர் சகரியா பூணன்.

"இன்று அவருடைய சத்தம்" என்கின்ற "குடும்ப தியான நூலிலிருந்து".

From:-

https://t.me/hisvoicetoday